ԱՐՄԵՆԱԼ գործարանը ՌՈՒՍԱԼ-ի աջակցությամբ հովանավորում է յոթնամյա Դավիթ Մելքոնյանի մասնակցությունը շախմատի աշխարհի մանկական առաջնությանը, որը կանցկացվի սեպտեմբերին Բաթումում:
Դավիթն Արաբկիր համայնքի շախմատի մանկապատանեկան դպրոցի սանն է, Երևանի չեմպիոնը և Հայաստանի առաջնության մրցանակակիրը:
ԱՐՄԵՆԱԼ գործարանի գլխավոր տնօրեն Արթուր Զաքարյանը հանդիպեց Դավիթ Մելքոնյանի և նրա մարզիչ Տիգրան Գասպարյանի հետ: Հյուրերը պատմեցին առաջնության մասին, որին կմասնակցեն 70 երկրներից ավելի քան 150 շախմատիստներ:
Պատանի շախմատիստը ընկերական խաղ անցկացրեց ԱՐՄԵՆԱԼ-ի գլխավոր տնօրենի հետ և միասին նկարվեցին Հայաստանի, Ռուսաստանի և ՌՈՒՍԱԼ-ի դրոշների ներքո: Արթուր Զաքարյանը հյուրին նվիրեց գործարանի տարբերանշանով մարզահագուստ, ընկերության փայլաթիթեղի գլանիկ, գիրք բարեմաղթանքներով և խոստացավ օգնել ռուսերենի ուսումնասիրության հարցում:
«Մենք խորապես շնորհակալ ենք ՌՈՒՍԱԼ-ին ցուցաբերած հովանավորության համար, առանց որի մեր մասնակցությունը մրցույթին դժվարին կլիներ: Առավելագույն ջանքերը կներդնենք, որպեսզի արդարացնենք ընկերության և բոլոր շախմատասերների հույսերը», - ասաց Տ.Գասպարյանը:
Այցի ավարտին Դավիթը մարզչի հետ ծանոթացավ ձեռնարկության թանգարանի ցուցանմուշներին և փայլաթիթեղի արտադրության առավել հետաքրքիր տեղամասերին:
Կապ՝
098 40-12-80
melkumyan_a@armenal.am
| Имя* | |
| Ваш e-mail адрес* | |
| E-mail получателя* | |
